Thursday, January 11, 2018

Տարեհաց. Ծիսական խոհանոց

Հունվարի 8-ից 26-ը` ուսումնական երկրորդ շրջանը, «Մխիթար Սեբաստացի» կրթահամալիրում ձմեռային-ուսումնական ճամբար է, որի ընթացքում Ավագ դպրոցում իրականացվում է նախագծային ուսուցում: Նախագծերի ցանկում ներառված է նաև «Ծիսական խոհանոց» նախագիծը, որի ընթացքում խումբը պատրաստում է ազգային-ավանդական-հայկական ճաշատեսակ-կերակրատեսակներ: 10-րդ դասարանի մի խումբ սովորողներ ընտրել են այս նախագիծն, ու աշխատանքային վիճակը սկսված է:
Նախագծի մեկնարկը տրվեց հետամանորյա տրամադրության հետ համահունչ մի կերակրատեսակով, որն է` հայկական տարեհացը: Հին ավանդույթ կա, որ թխվածքի մեջ դնում են մի փոքրիկ ու տափակ իր: Ասում են, եթե այդ կոպեկը քեզ ընկնի, ուրեմն տարին քեզ համար հաջողակ կլինի, իսկ եթե դանակը դեմ է առնում կոպեկին՝ անհաջողություն է լինելու: Արեցինք նաև սա, և խմորի հետ խառնեցինք մի մանրադրամ: Երբ տարեհացը պատրաստ էր հյուրասիրեցինք նաև ընկեր Մարթային, ընկեր Լիլիթին ու ընկեր Լուսինեին: Տարին հաջողակ դարձավ ընկեր Ջուլիի համար: Տարեգաթան պատրաստեցինք սիրով և սիրով էլ համտեսեցինք` թեյախմությամբ: Կարծում եմ, բոլորին դուր եկավ, այն իսկապես համեղ էր:
Սիրով ձեզ կներկայացնեմ տարեհացի բաղադրատոմսն ու պատրաստման եղանակը.

5 բ. ալյուր
1 բ. ձեթ
1 բ. տաք ջուր
1 բ. շաքարավազ
1 թ. գ. սոդա
1 ճ.գ. քացախ
1 բ. մանրացված ընկուզեղեն (ընկույզ, նուշ, կաղին, ծիրանակուտ)
½ բ. չամիչ
կանեփ կամ քունջութ՝ վրան ցանելու համար

Ալյուրին խառնել շաքարավազն ու սոդան. վրան լցնել ձեթը, քացախն ու ջուրը և շաղել: Խառնել մանրացված ընկուզեղենն ու չամիչը, տեղադրել ալյուրոտած ջեռոցի ամանում, մեջը խրել պայմանական միջինքը, վրան ջուր քսել, ցանել սերմերը և
թխել միջին ջերմաստիճանով ջեռոցում` 35 – 40 րոպե:
Բարի ախորժակ:

No comments:

Post a Comment